അന്നൊരു ശനിയാഴ്ച ആയിരുന്നു. അവധി ദിവസങ്ങളിൽ തറവാട്ടിലെ ആൺകുട്ടികൾ എല്ലാരും എന്ന് പറഞ്ഞാൽ ഏതാണ്ട് പത്തു പതിനാറെണ്ണം കൂടി പുഴയിൽ കുളിക്കാൻ പോകുന്ന പതിവുണ്ട്. അന്നും പതിവ് തെറ്റിച്ചില്ല. പുഴയിലെ വെള്ളത്തിൽ നീന്തി തുടിച്ച് ആർത്തുല്ലസിച്ചു കളിച്ചു കുളിക്കുന്ന നേരം. കൂട്ടത്തിൽ മൂത്തവൻ ഉണ്ണി രണ്ടാമത്തവൻ അപ്പു. അപ്പുവിന് കുറച്ചു വൃത്തി കൂടുതലാണ്. അത് കൊണ്ട് തന്നെ കൂട്ടത്തിൽ നിന്നും മാറി പുഴയിൽ ഇറങ്ങി പതുക്കെ കുളിക്കുന്നു. കുറച്ചു നേരം കഴിഞ്ഞപ്പോ കൂട്ടത്തിൽ ഒരുത്തൻ ഉണ്ണിയോട് "ഏട്ടാ അങ്ങോട്ട് നോക്കിയേ, അപ്പുവേട്ടൻ എന്താ കാട്ടുന്നേ" ഉണ്ണി നോക്കുമ്പോ അപ്പു വെള്ളത്തിൽ തുള്ളി കളിക്കുന്നു. ഇവൻ ഇതെന്ന് അഭ്യാസം ആണാവോ കാണിക്കുന്നേ എന്ന് ആലോചിച്ചു നിൽക്കുമ്പോ ആണ് മറ്റൊരു കാഴ്ച ഒരു വള്ളം അതിലെ ആളുകൾ പങ്കായം പൊക്കി പിടിച്ചോണ്ട് തല്ലാൻ കണക്കാക്കി വരുന്നു. 'ഈശ്വരാ ഇനി ഇവൻ വല്ല വൃത്തികേടും കാട്ടിയോ. ഇവനെ തല്ലാനാണോ ഇവര് തുഴയും പൊക്കി പിടിച്ചോണ്ട് വരുന്നേ' ഉണ്ണീടെ ചിന്തകളെ മുറിച്ചു കൊണ്ട് വള്ളക്കാർ ഒച്ച വച്ച്..
"വെള്ളത്തീന്ന് കേറിപോടാ പിള്ളേരെ"
അവന്മാരുണ്ടോ കേൾക്കുന്നു.
വഞ്ചിക്കാര് ചീത്തപറയാൻ തുടങ്ങി.
"എന്താ ചേട്ടാ കാര്യം. എന്തിനാ വെള്ളത്തീന്ന് കേറുന്നേ" കൂട്ടത്തിൽ ആരോ ചോദിച്ച്.
" നീർനായ ഉണ്ട് വെള്ളത്തിൽ. വേഗം കേറി പോ"
കേട്ട പാതി കേൾക്കാത്ത പാതി എല്ലാരും ഓടി കരക്ക് കയറി.
അപ്പു മാത്രം വെള്ളത്തിൽ. അവൻ അപ്പോഴും തുള്ളികളിക്കുന്നു. ഇവൻ എന്താ ഈ കാണിക്കുന്നേ. ഇവന് വട്ടായോ.
പിന്നെയല്ലേ കാര്യം പിടികിട്ടിയെ. അപ്പു അത്യാവശ്യം നല്ല വെളുത്തിട്ടാണ്. നീർനായ വെള്ളത്തിലൂടെ വന്നപ്പോ ദേ വെളുവെളുത്ത് എന്തോ ഒന്ന്.. ഒന്നല്ല രണ്ട്.. പിന്നെ നീർനായ ഒന്നും നോക്കിയില്ല. ഒറ്റ കടി. കടിച്ചാൽ പിന്നെ ആ മാംസം കിട്ടാതെ അതൊട്ട് കടി വിടേം ഇല്ല.
തോണിക്കാര് പങ്കായത്തിന് അടിച്ചു ഒരു വിധം അതിന്റെ പിടി വിടുവിച്ചു. അപ്പുനെ എടുത്ത് തോണീലിട്ട് കരയിൽ എത്തിച്ചു. അവന്റെ പിന്നീന്നു ചോര ഒഴുകുന്നു. "ആശുപത്രിയിൽ പോവണ്ടായേ" എന്ന് അപ്പുന്റെ അലർച്ച. " നല്ല മുറിവുണ്ട്. ആശുപത്രിയിൽ കൊണ്ടോവാതെ പറ്റില്ല." തോണിക്കാർ പറഞ്ഞു.
"എവിടെ കൊണ്ടോയാലും പാലക്കൽ കൊണ്ടുവല്ലേ"
പാലക്കൽ തറവാട്ടു വക ആശുപത്രി ആണ്. അവിടെ ഡോക്ടർ മുതൽ സെക്യൂരിറ്റി വരെ എല്ലാരും പരിചയക്കാരാണ്. അവരെ എങ്ങനെ ഈ പിന്നാമ്പുറം കാണിക്കും.
അങ്ങനെ അവസാനം മിഷൻ ഹോസ്പിറ്റലിൽ കൊണ്ടുപോയി.
നട്ടെല്ലിനോട് ചേർന്നായിരുന്നു മുറിവ്. അതുകൊണ്ട് മരവിപ്പിക്കാൻ പറ്റില്ല. പച്ച മാസത്തിൽ തന്നെ സ്റ്റിച്ച് ഇടണം.
അപ്പുന്റെ ശ്രദ്ധ മാറ്റാൻ നേഴ്സ് അവനോട് വിശേഷം ചോദിക്കാൻ തുടങ്ങി.
"മോന്റെ പേരെന്താ."
അഭിനവ്
"മോൻ എവിടാ പഠിക്കുന്നേ"
അവൻ സ്കൂളിന്റെ പേര് പറഞ്ഞു
"അവിടെ ഏതു വിഷയം"
പ്ലസ് വൺ ബയോമാത്സ്
"മോൻ മുഖം ഒന്ന് തിരിച്ചേ"
അവൻ മെല്ലെ തിരിഞ്ഞു
"ഡാ നീ അഭിനവ് വർമ അല്ലേ. ദിവ്യടെ ക്ലാസ്സിലെ. ഞാൻ ദിവ്യെടെ അമ്മയാ."
സ്റ്റിച്ച് ഇടലൊക്കെ കഴിഞ്ഞ് വീടെത്തി. ഇരിക്കാനോ മലർന്നു കിടക്കാനോ പറ്റാതെ അപ്പു നന്നേ വിഷമിച്ചു. ഏതാണ്ട് ഒന്നൊന്നര മാസം എടുത്തു എല്ലാം ഉണങ്ങി ഭേദം ആവാൻ.
അങ്ങനെ എല്ലാം ഓക്കേ ആയി സ്കൂളിൽ പോകാറായി. പക്ഷെ അവൻ എന്ത് ചെയ്താലും സ്കൂളിൽ പോവില്ല. കാരണം തിരക്കിയപ്പോ അവൻ പറഞ്ഞു
"ആ തള്ള എന്റെ എല്ലാം കണ്ടു. അവർ അതു ആ പെണ്ണിനോടും പറഞ്ഞിട്ടുണ്ടാവും. ഞാൻ ഇനി ആ സ്കൂളിൽ പോവൂല"
അങ്ങനെ അവസാനം ഒരു നീർനായ കാരണം അപ്പുന്റെ സ്കൂൾ മാറി
